Одбележување на Неделата на борба против гладта

Светскиот ден на храната оваа година е посветен на темата „Водата е живот, водата е храна“. Темата има за цел да ја истакне критичната улога на водата за животот на земјата и водата како основа на нашата храна. Исто така, се обидува да ја подигне глобалната свест за важноста на мудро управување со водата бидејќи брзиот раст на населението, економскиот развој, урбанизацијата и климатските промени ја загрозуваат достапноста на водата.

 

Светскиот ден на храната се одржува секоја година на 16 октомври и промовира свесност за гладот и акција за иднината на храната, луѓето и планетата. Организацијата за храна и земјоделство на ОН (ФАО) го одреди 16 октомври како Светски ден на храната во 1979 година. Таа има 194 земји членки, меѓу кои е и нашата земја (од 8 ноември 1993 година).

 

Гладта во Светот е сложено прашање. Светските решенија за глад вклучуваат:

– Да се помогне на луѓето да обезбедат храна за себе на одржлив начин

– Да се охрабрат поединците и деловните субјекти да донираат за борба против гладта

– Да се обезбеди пристап до образование, кое е најдобрата одбрана од сиромаштијата и гладот

– Да се зголемени интервенцијата во рамки на системите за поддршка на државата

 

Факти за гладта во Светот:

– Околу 821 милион луѓе се хронично ненахранети, повеќе од 785 милиони евидентирани во 2015 година.

– Речиси 99% од недоволно исхранетите луѓе живеат во земјите во развој.

– Околу 60% од гладните луѓе во светот се жени.

– Речиси 20 милиони бебиња се раѓаат секоја година со мала родилна тежина, од кои 96,5% се во земјите во развој.

– Околу 50% од сите смртни случаи кај децата се под 5 години поради недоволна исхранетост.